Giggs: Getum enn bjargað tímabilinu

Ryan Giggs, leikmaður Manchester United, segir að hans lið geti vel bjargað tímabilinu þó svo að liðið sé dottið út úr meistaradeildinni. United var slegið út af þýska liðinu FC Bayern.

„Auðvitað getum við bjargað tímabilinu þó svo að vonbrigðin séu mikil eftir leikinn gegn Bayern," sagði Giggs í samtali við The Independent.

„Það er margt jákvætt í gangi, við eigum nú fimm leiki eftir og við verðum að vinna þá alla. Það verður ekki auðvelt en við getum það. Það er vonandi að Chelsea og Arsenal misstígi sig, það er það sem við allir vonum.

Giggs talar um að það sé mikilvægt að læra af öllum vonbrigðum líkt og þeir félagar upplifðu eftir leikinn gegn FC Bayern.

„Þegar ég var 18 og 19 ára gamall þá varð ég oft vonsvikinn en ég upplifði líka góðan árangur og það hjálpar manni þegar ferillinn heldur áfram. Þú verður að taka þungu högginn á ferlinum en þetta snýst um hvernig þú kemur til baka og það er það sem gerir þig að Manchester United leikmanni," sagði Giggs vongóður að lokum.