Fundi stjórnar og stjórnarandstöðu lokið um Icesave - málum miðar vel

Ríkisstjórn og stjórnarandstöðuflokkar kláruðu fund sín á milli í Fjármálaráðuneytinu nú fyrir stundu varðandi Icesave. Utanríkisráðherrann Össur Skarphéðinsson sat fundinn fyrir hönd Samfylkingarinnar, en Jóhanna Sigurðardóttir er í fríi erlendis eins og Vísir hefur greint frá. Þá sat Steingrímur J. Sigfússon, fjármálaráðherra, fundinn fyrir Vinstri græna.

Fréttablaðið sagði frá því í morgun að flest bendi til betri lausnar í Icesave-málinu og var þá nefnt sérstaklega að Bretar og Hollendingar séu tilbúnir að semja upp á nýtt um afborganir og vexti.

Steingrímur sagði í viðtali við Vísi í morgun að frétt Fréttablaðsins væri um óorðinn hlut og of snemmt að segja nokkuð til um það. Engar samningaviðræður hafa verið á milli landanna.

Þegar haft var samband við Birgittu Jónsdóttur, þingmann Hreyfingarinnar, sagði hún að stjórn og stjórnarandstaða væru að finna flöt til þess að vinna út frá. Hún vildi lítið tjá sig um það sem gerðist á fundinum. Aðspurð hvort óhætt væri að fullyrða að viðræður væru að þokast áfram á milli flokkanna sagði hún svo vera.

Hún tók hinsvegar sérstaklega fram að ekki væri búið að kvitta undir neina fullkomna samstöðu á milli meirihlutans og minnihluta.

Steingrímur J. Sigfússon sagði fundinn hafa gengið vel. Menn hefðu verið að fara yfir stöðuna og þetta hefði áfram verið í jákvæðum farvegi. Hann sagði málin vera að þróast og að unnið verði í málinu áfram. Aðspurður um aðkomu erlendra ráðgjafa svaraði Steingrímur:

„Við verðum að stíga varlega til jarðar í þessu öllu saman þar sem við séum ekki ein í ráðum."

Steingrímur sagðist lítið annað geta sagt en að málum miði vel. Samkvæmt heimildum Vísis má búast við að málin skýrist um helgina.