Sakborningar munu eiga kost á að koma athugasemdum á framfæri

Sakborningarnir í mansalsmálinu munu eiga kost á því að vera í herbergi nálægt dómssalnum þar sem þeir eiga kost á því að fylgjast með vitnaleiðslum yfir brotaþola í gegnum fjarfundabúnað. Þetta segir Kolbrún Sævarsdóttir saksóknari hjá embætti Ríkissaksóknara. Hún vísar í dóm Hæstaréttar máli sínu til stuðnings.

Hæstiréttur úrskurðaði á föstudag að Litháarnir sem ákærðir eru fyrir aðild að mansali í máli 19 ára stúlku munu þurfa að víkja úr dómsal á meðan að stúlkan ber vitni gegn þeim. Eiríkur Elís Þorláksson, lögmaður eins af sakborningunum, segist telja að niðurstaða meirihluta Hæstaréttar sé mjög umdeilanleg. Það sé hluti af málsvörn mannsins að hann sé á staðnum þegar að mikilvægt vitni gefi skýrslu.

Kolbrún segir að það verði túlkur viðstaddur vitnaleiðsluna sem tryggi að sakborningar heyri allt og hugsanlegt sé að verjandi geti farið til þeirra og spurt þá hvort eitthvað sé sem þeir vilji koma á framfæri.