Segir mannréttindi brotin á meintum mansalsmönnum

„Ég tel að niðurstaða meirihluta Hæstaréttar sé mjög umdeilanleg. Það er hluti af málsvörn mannsins að hann sé á staðnum þegar að mikilvægt vitni gefur skýrslu," segir Eiríkur Elís Þorláksson, verjandi eins Litháans sem ákærður er fyrir aðild að mansali í máli 19 ára gamallar litháískrar stúlku.

„Hann á samkvæmt lögum að hafa rétt til þess að vera viðstaddur og byggja vörn sína meðal annars á því. Sá réttur hans er meðal annars talinn leiða af stjórnarskránni og mannréttindasáttmála Evrópu. Þröng skilyrði eru fyrir því að víkja frá þessari meginreglu. Það kunna að koma upp spurningar sem hann myndi vilja leggja fyrir vitnið" segir Eiríkur Elis. Manninum gefist ekki kostur á því. „Þannig að ég er ósammála þessum dómi en sammála sératkvæðinu, sem er algjörlega í samræmi við dómaframkvæmd hingað til." segir Eiríkur Elís.

Eiríkur segir að úrskurður Hæstaréttar sé byggður á læknabréfi um geðlæknisfræðileg atriði, þ.e. að andlegt ástand vitnisins sé slæmt. Sá sem riti læknabréfið sé hins vegar ekki geðlæknir og því afar varhugavert að víkja til hliðar stjórnarskrárbundnum rétti manna á þeim grundvelli.