Reyndi að kúga Letterman

Robert Joel Halderman, sjónvarpsframleiðandi, hefur viðurkennt að hafa reynt að kúga fé út úr spjallþáttastjórnandanum David Letterman.

Letterman kom áhorfendum sínum í opna skjöldu í haust þegar hann viðurkenndi, í beinni útsendingu, að hann hefði átt í kynferðislegu sambandi við fjölmargar samstarfskonur sínar á undanförnum árum. Hann greindi jafnframt frá því að Halderman hafi reynt að kúga tvær milljónir dollara út úr sér. Hann starfaði sem framleiðandi hjá CBS sjónvarpsstöðinni þar sem þættir Lettermans eru sýndir.

Þáttastjórnandinn leitaði í kjölfarið til saksóknara í New York sem hefur gert samkomulag við sjónvarpsframleiðandann sem felur í sér að hann verður í fangelsi í hálft ár og þarf auk þess að vinna 1000 klukkustundir í samfélagsvinnu. Hefði málið farið fyrir dómstóla hefði hann mátt búast við að sitja í fangelsi í allt að 15 ár vegna málsins.