Kallaði eftir lægri álögum á bensín

Skattahækkanir hafa hækkað bensínlítrann um 26 krónur á lítrann á undanförnu ári, sagði Ásbjörn Óttarsson, þingmaður Sjálfstæðisflokksins, á Alþingi í dag. Hann sagði að þetta þýddi að bensínkostnaður fyrir meðalfjölskyldu hækki um rúmar 50 þúsund krónur á ári. Ásbjörn spurði Magnús Orra Schram, þingmann Samfylkingarinnar, hvort hann sæi fyrir sér að álögur á bensín yrðu lækkaðar.

Magnús Orri Schram sagði að bensínverð væri umtalsvert lægra hér á landi ef ekki hefði orðið hrun. Flest allar vörur hefðu hækkað í verði vegna hrunsins. Hann benti þó á að bensínverð væri 40-50 krónum lægra á Íslandi en í ríkjum víða í kring. Það væri vegna þess að álögur væru lægri á Íslandi.

Þá spurði Magnús Orri, hvort Sjálfstæðismenn gætu hugsað sér að koma með Samfylkingunni í þá vegferð að skipta um gjaldmiðil. Með því mætti lækka kostnað heimilanna.