Bílabíó á Reykjavíkurflugvelli í kvöld

Flugskýli 3 við Reykjavíkurflugvöll fær nýtt hlutverk í kvöld. RIFF, Alþjóðlega kvikmyndahátíðin í Reykjavík, heldur þar árlegt bílabíó sitt og er það smellurinn Cry Baby með Johnny Depp í aðalhlutverki sem verður varpað upp á hvíta tjaldið.

Til að komast að flugskýlinu þarf að keyra í gegnum Skerjafjörðinn og inn á flugvöllinn. Svo er keyrt inn í flugskýlið og útvarpið í bílnum stillt á hljóðrás myndarinnar. Aðgangseyrir er 1.000 krónur á mann.

Margt fleira er að gerast á RIFF í kvöld. Leikstjórinn Árni Sveinsson frumsýnir heimildarmyndina Með hangandi hendi í Háskólabíó klukkan 20. Myndin fjallar um söngvarann ástsæla Ragnar Bjarnason, sem tekur lagið fyrir sýningu. Eftir sýningu situr Árni fyrir svörum.

Vegna gríðarlegra vinsælda kvikmyndarinnar The Most Dangerous Man In America: Daniel Elfsberg and the Pentagon Papers, verður aukasýningu á myndinni bætt við í Bíó Paradís klukkan 18.30. Judith Ehrlich, leikstjóri myndarinnar, verður viðstödd sýninguna og mun sitja fyrir svörum að henni lokinni. Myndin var tilnefnd til Óskarsverðlauna sem besta heimildarmyndin árið 2010.

Nánari upplýsingar um dagskrána eru á heimasíðu hátíðarinnar, riff.is.