Geiri á Goldfinger íhugar skaðabótamál gegn ríkinu

„Ég er að velta fyrir mér skaðabótamáli gegn ríkinu," segir Ásgeir Þór Davíðsson, eigandi nektardanstaðsins Goldfinger í Kópavogi en Alþingi samþykkti lög í dag þar sem nektardans er bannaður með öllu.

Alls greiddu 31 þingmaður með frumvarpinu en tveir þingmenn Sjálfstæðisflokksins sátu hjá.

Ásgeir er ekki sáttur við niðurstöðu mála og segist íhuga skaðabótamál þar sem veitingarekstur hans er orðinn ólöglegur.

„Mér finnst þessir þingmenn bara vera bölvaðar kvígur," sagði Ásgeir sem er ekki sáttur við sitt hlutskipti.

Steinunn Valdís Óskarsdóttir, þingkona Samfylkingarinnar, sagði í dag að lögin væru söguleg.