Heimurinn borgar 608 milljarða fyrir enska boltann næstu þrjú árin

Tekjur vegna sölu á sjónvarpsrétti fyrir ensku úrvalsdeildina nema rúmlega sexhundruð milljörðum króna á næstu þremur árum. Dagblaðið Independent birti í dag tekjutölur fyrir núgildandi samninga sem gilda frá 2010 til 2013. Enska úrvalsdeildin er sýnd í sjónvarpi í 211 löndum.

Á núverandi gengi aflar deildin 267 milljarða króna fyrir sjónvarpsréttinn utan Bretlands samkvæmt núgildandi samningum en síðast var þessi upphæð 120 milljarðar. Þetta er 122,5 % prósenta tekjuaukning og munu þessar upphæðir hækka enn frekar eftir þrjú ár þar sem útsendingaraðilum fer fjölgandi.

Innan Bretlands var rétturinn seldur á 341 milljarð króna í fyrra og því eru tekjurnar fyrir næstu þrjú árin samtals 608 milljarðar króna.

Þessi aukning skilar sér áþreifanlega til félaganna í úrvalsdeildinni sem frá og með næsta tímabili fær hvert félag um fjóra og hálfan milljarð króna í sinn hlut í stað tæpa tveggja milljarða króna nú.