Lescott gæti misst af restinni af tímabilinu og þar með HM

Joleon Lescott, varnarmaður Manchester City og enska landsliðsins, er að glíma við vöðvatognun aftan í læri og það gæti farið svo að hann spilaði ekki meira með City á þessu tímabili. Það myndi jafnframt þýða að hann missti af HM í Suður-Afríku í sumar.

Lescott meiddist í upphitun fyrir sigurleikinn á móti Fulham um síðustu helgi og nýjustu fréttir eru að hann verði frá keppni í allt að sex vikur.

Lokaleikur Manchester City á tímabilinu er 9. maí og það er nánast öruggt að ef hann nær ekki að spila fyrir þann tíma þá verður hann ekki inn í myndinni hjá landsliðsþjálfaranum Fabio Capello þegar hann velur HM-hópinn sinn.

Lescott missti af tólf leikjum fyrr á tímabilinu þegar hann fór í aðgerð á fæti en hann kom til City frá Everton fyrir þetta tímabil. City hefur aðeins tapað 1 af 18 leikjum sem Lescott hefur spilað á tímabilinu.