Hætti ekki með Chelsea sama hvernig fer

Carlo Ancelotti segir að hann verði stjóri Chelsea á næstu leiktíð þó svo liðið verði ekki enskur meistari né bikarmeistari.

Sögusagnir eru um að eigandinn, Roman Abramovich, hafi orðið afar pirraður er Chelsea féll úr leik í Meistaradeildinni og sé síðan komið í þriðja sætið í ensku deildinni. Því sé hann að íhuga að skipta um stjóra.

Þessar sögusagnir trufla ekki Ancelotti.

„Fyrst af öllu þá held ég að þetta verði gott tímabil. Sama hvað gerist þá verð ég áfram hjá Chelsea næsta vetur," sagði Ancelotti sem vill ekki afsaka sig of mikið með lélegt gengi síðustu vikur.

„Við höfum verið að lenda í meiðslum og það hefur vissulega áhrif. Við vorum líka án leikmanna meðan Afríkukeppnin fór fram. Það lenda öll lið í áföllum og meiðsli geta ekki verið afsökuna."