Lögreglan í átaki til að auka stefnuljósanotkun

Lögreglan á höfuðborgarsvæðinu mun á næstu fjórum vikum leggja áherslu á eftirlit með stefnuljósanotkun ökumanna.

Lögreglan segir að hagræði að notkun stefnuljósa fyrir aðra vegfarendur sé ótvírætt. Þau skuli nota þegar breytt er um akstursstefnu, skipt um akrein, ekið út úr hringtorgi og svo framvegis. Það auki öryggi í umferð að nota stefnuljós, lýsi ábyrgum akstri og sé sjálfsögð kurteisi gagnvart öðrum þeim sem í umferð eru.

Lögreglan mun einnig fylgjast með svokölluðum svigakstri í þéttri umferð þar sem ökutækjum er ekið milli akreina yfir umferðarhraða, gjarnan án þess að stefnumerki séu gefin. Slíkur akstur truflar aðra ökumenn og skapar hættu. Lögreglan hvetur ökumenn til að sýna hver öðrum þá tillitssemi sem þeim ber í umferð, hvort heldur það lýtur að notkun stefnuljósa eða ógætilegum akstri.