Formaður HK segir félagið ekki notað í pólitískum tilgangi

„Þetta bréf er ekki á vegum HK," segir formaður HK í Kópavogi, Sigurjón Sigurðsson, um bréf sem hefur ratað á félagsmenn og þeir hvattir til þess að skrá sig í Sjálfstæðisflokkinn til þess að kjósa Ármann Kr. Ólafsson í prófkjöri flokksins. Bréfið er stílað á félagsmenn íþróttafélagsins en þar segir meðal annars:

„Nú verðum við að sameinast og tryggja það að Gunnar I. Birgis fái ekki oddvitasæti Sjálfstæðisflokksins í Kópavogi. Hann er búinn að opinbera það að hann ætli sér ekki að leyfa HK að fá Kórinn og stuðlar því að félagið okkar þarf að starfa á a.m.k. þremur stöðum til þess að þjónusta börn og unglinga í Kópavogi. Það er algjörlega óásættanlegt í ljósi þess að félögin sjálf eru að mestu búin að finna lausn sinna mála en hann er búinn að stoppa það og ætlar að standa fast á þessu."

Gunnar Birgisson, fyrrum bæjarstjóri Kópavogs, hafði samband við Sigurjón í dag vegna bréfsins og spurði hvort það væri á vegum íþróttahreyfingarinnar.

„Gunnar hafði samband og spurði út í þetta. Það er ekki verið að beita félaginu gegn honum," segir Sigurjón en sjálfur sækist hann eftir þriðja sætinu í prófkjöri Sjálfstæðisflokksins.

„Athygli vekur að í bréfinu segir: Ég hvet því ykkur til þess að skrá ykkur strax í dag, sama hvort þið séuð sjálfstæðismenn eða ekki, og aðstoða okkar menn til þess að berjast fyrir málstaði HK. Við viljum Gunnar burt og það þýðir að við verðum að taka þátt í prófkjörinu nk. laugardag.

Ég ætla að ítreka það að þó svo að menn skrái sig þá er hægt að skrá sig úr félaginu strax eftir prófkjör. Það þarf bara að láta mig eða Sigurjón vita."

Þegar Sigurjón er spurður hvort ekki sé verið að tala um hann svarar hann: „Greinilega tengist þetta stuðningsmönnum mínum en ekki félaginu."

Það var fyrrverandi starfsmaður HK sem sendi bréfið út. Þegar Sigurjón er spurður hvort póstlisti HK hafi verið notaður, en foreldrar hafa meðal annars fengið póstinn í sínar hendur og eru ósáttir við það, svarar Sigurjón að það sé ómögulegt. Hann hyggist þó kanna hvort póstlistinn hafi verið misnotaður.

Prófkjörið fer fram næsta laugardag en baráttan hefur verið áberandi hörð í aðdraganda prófkjörsins. Meðal annars hefur núverandi bæjarstjóri Kópavogs, Gunnsteinn Sigurðsson, sakað Gunnar Birgisson um að eiga í óeðlilegum viðskiptum við Halldór Jónsson á kostnað bæjarins. Það mál verður tekið fyrir á næsta bæjarráðsfundi Kópavogsbæjar.