Grikkir þurfa að skera grimmt niður

George Papandreou, forsætisráðherra Grikklands, fór í gær formlega fram á aðstoð frá Alþjóðagjaldeyrissjóðnum sem á að tryggja að ríkissjóður landsins lendi ekki í greiðsluþroti á næstunni.

Á hinn bóginn þurfa Grikkir að skera grimmt niður í ríkisrekstrinum og til lengri tíma er enn óvíst um fjárhagsstöðu ríkisins.

Samkvæmt áætlun sjóðsins, sem gerð var í samvinnu við ESB, eiga Grikkir að fá aðstoð næstu þrjú árin, þar af tíu milljarða evra frá sjóðnum á þessu ári og 30 milljarða evra frá aðildarríkjum evrusvæðis ESB.

Áður en Grikkir fá peningana þurfa þó bæði framkvæmdastjórn ESB og evrópski seðlabankinn að veita samþykki sitt, og sömuleiðis þurfa fimmtán ríki evrusvæðisins að samþykkja aðstoðina.

Papandreou, sem tók við í haust, kennir fyrri stjórn hægrimanna um kollsiglingu efnahagslífsins. „Við fengum í arf skip sem var komið að því að sökkva,“ sagði Papandreou í gær.

Almenningur í Grikklandi hefur harðlega mótmælt niðurskurði stjórnarinnar, sem bitnar á landsmönnum öllum. Grísk verkalýðsfélög brugðust hart við boðskap forsætisráðherrans í gær og segjast ætla að herða verkfallsaðgerðir.- gb