Segir vinnubrögð ámælisverð

„Það er ljóst að fyrirtæki Halldórs voru færð verk á silfurfati og tilboða ekki leitað. Það er ólíðandi í opinberri stjórnsýslu og brýnt að alltaf sé leitað tilboða til að tryggja hagstæðasta verð,“ segir Guðríður Arnardóttir, bæjarfulltrúi Samfylkingarinnar í Kópavogi.

Líkt og Fréttablaðið hefur greint frá síðan á laugardag fékk Halldór Jónsson verkfræðingur greiddar 71,5 milljónir króna fyrir vinnu við sjö framkvæmdir á vegum bæjarins á fimm ára tímabili til 2008.

Gunnsteinn Sigurðsson, bæjarstjóri Kópavogs, hefur óskað eftir úttekt á því hvernig staðið var að ráðningu Halldórs. Ómar Stefánsson, bæjarfulltrúi framsóknarmanna, segir Halldór rúinn trausti. Málið verður tekið upp á fundi bæjarráðsins á fimmtudag.

Guðríður fór á bæjarskrifstofur Kópavogs í gær og er verið að taka saman verksamninga sem tengjast vinnu Halldórs. Þá telur hún eðlilegt að bæjarráð óski eftir áliti samgönguráðuneytis hvort Halldór hafi mátt vera skoðunarmaður Kópavogsbæjar á meðan hann vann önnur verk fyrir bæinn í gegnum ráðgjafafyrirtækið Hall­stein. Hún gerir ekki athugasemdir við að nokkrir reikningar Halldórs hafi borist seint. Slíkt geti skrifast á samninga um að halda eftir greiðslu í ákveðinn tíma eftir verklok. - jab