Ekkert mál að spila með öðru félagi

Einn þarfasti þjónn Liverpool, Jamie Carragher, segir að það yrði lítið mál að labba burt frá Liverpool og spila með öðru félagi ef hann fær ekki nýjan samning.

Eitt ár verður eftir af núverandi samningi Carraghers í sumar og Liverpool er ekki enn búið að bjóða honum nýjan samning.

Carragher hefur spilað allan sinn feril með Liverpool og lék sinn 600. leik fyrir félagið fyrr í vetur.

„Félagið býður mér nýjan samning ef þeir hafa áhuga á því. Ef ekki þá skiptir það ekki máli. Ég mun samt alltaf leggja mig allan fram og ef ég þarf að fara annað þá fer ég bara annað. Það myndi ekkert trufla mig," sagði Carragher sem orðinn er 32 ára.