Pútín vakir yfir rannsókninni

Vladímir Pútín, forsætisráðherra Rússlands, hefur lýst því yfir að hann muni persónulega fylgjast með rannsókn á flugslysinu þegar forseti Póllands og fylgdarlið hans fórst í flugslysi í vesturhluta Rússlands í gær. Flest bendir til að mistök flugmanna hafi orsakað slysið þegar Lech Kaczynski, forseti Póllands, eiginkona hans og tugir æðstu embættismanna landsins fórust við  Smolensk í Rússlandi í gærmorgun.

Jaroslaw Kaczynsky tvíburabróðir forsetans kom að slysstaðnum í gær en fréttir herma að hann sé eyðilagður maður vegna slyssins. Þeir bræður stofnuðu saman stjórnmálaflokkinn Lög og réttur eftir fall Sovétríkjanna og er hinn eftirlifandi bróðir formaður flokksins. Bróðir hans sem lést í gær hugðist bjóða sig fram að nýju í embætti forseta Pólands þegar kjörtímabili hans hefði lokið á þessu ári.

Boðað verður til forsetakosninga í landinu innan tveggja mánaða samkvæmt stjórnarskrá landsins, en hún kveður á um að forseti þingsins í landinu fari með völd forseta þangað til.

Lík þeirra sem létust í flugslysinu voru flutt til Moskvu höfuðborgar Rússlands seint í gær þar sem kennsl verða borin á þau. Lík forsetans hefur fundist og þegar verið borin kennsl á hann.