Þingmenn til Bretlands til að laga samskiptin

Árni Þór Sigurðsson, formaður utanríkismálanefndar Alþingis, segir að fundur með utanríkismálanefnd og fjárlaganefnd breska þingsins verði vonandi til þess að bæta samskipti Íslands og Bretlands, sem hafa verið í lágmarki eftir þjóðaratkvæðagreiðsluna um Icesave-lögin.

Fimm nefndarmenn úr utanríkismálanefnd fóru til Lundúna nú undir kvöld til að ræða við bresku þingmennina. Auk Árna Þórs fóru Bjarni Benediktsson, Valgerður Bjarnadóttir, Gunnar Bragi Sveinsson og Birgitta Jónsdóttir. Tilurð ferðarinnar var með þei hætti að Árni Þór hafði samband við Mike Gapes, formann utanríkismálanefndar breska þingsins, með það fyrir augum að opna á samskipti ríkjanna eftir að niðurstaða þjóðaratkvæðagreiðslunnar um Icesave-lögin lá fyrir.

Árni Þór segir fundina með Bretum mikilvæga til að laga samskiptin milli ríkjanna sem hafi verið lítil frá þjóðaratkvæðagreiðslunni um Icesave, en engir formlegir samningafundir hafa farið fram milli ríkjanna frá því íslenska þjóðin kolfelldi Icesave-lögin í þjóðaratkvæðagreiðslunni.

Auk funda með utanríkismálanefnd breska þingsins munu íslensku þingmennirnir funda með John McFall, formanni fjárlaganefndar og öðrum nefndarmönnum. Rætt hefur verið um að bíða með að semja um Icesave þangað til ný stjórn hefur verið mynduð í Bretlandi.

Árni Þór Sigurðsson segir að ný ríkisstjórn í Bretlandi veiti enga tryggingu fyrir betri samningum, því sé ekki sjálfgefið að heppilegt sé að bíða þangað til þingkosningar eru yfirstaðnar í landinu en þær eru fyrirhugaðar í maí næstkomandi.