Rebekka fékk forræðið yfir tveimur systkinum sínum

Rebekka María Jóhannesdóttir, 23 ára gömul kona, hefur fengið forræðið yfir systkinum sínum tveimur. Rebekka missti móður sína síðastliðið haust og föður sinn tveimur árum áður,

Rebekka sagði frá þessu í sjónvarpsþættinum Ísland í dag sem sýndur var nú í kvöld. Við sögðum frá Rebekku hér á Vísi síðastliðið haust, skömmu eftir að móður hennar féll frá. Þá hafði hún þegar hafið baráttuna fyrir forræðinu yfir systkinum sínum. Hún segir að tíminn sem liðinn er hafi verið mjög indæll en það hafi verið erfitt að lifa í óvissunni. „Maður varð að peppa sjálfan sig upp og vera viss um að þetta færi allt vel," sagði Rebekka. Hún fékk síðan forræðið fyrir tveimur vikum síðan eftir að hafa gengið í gegnum forræðishæfnispróf. „Ég fékk hálft ár til að sanna mig og ég gerði það," sagði Rebekka.

En það hefur fleira gerst í lífi Rebekku því að hún fæddi frumburð sinn í nóvember. Og hún segist vera hamingjusöm. „Ég held að ég sé hamingjusamasta þriggja barna einstæða móðir á Íslandi, allavega með þeim hamingjusömustu," sagði Rebekka.

Rebekka segir þau systkinin hafa átt marga góða að sem hafi hjálpað þeim í öllum raunum þeirra, fjölskylda, vinir og nágrannar.