Berst fyrir forræði yfir bræðrum sínum

Rebekka María Jóhannesdóttir, 22 ára gömul kona úr Hafnarfirði, berst nú fyrir forræði sjö ára og tæplega tveggja ára gamalla bræðra sinna eftir að móðir þeirra féll frá.

Faðir Rebekku Maríu lést fyrir tveimur árum og móðir hennar lést þann 25. ágúst síðastliðinn, aðeins fertug að aldri. Rebekka segir að þegar henni hafi orðið ljóst í sumar að stutt væri í að mamma hennar myndi látast hafi hún farið í að gera ráðstafanir til þess að þau systkinin yrðu ekki aðskilin þegar móðir hennar væri látin. Móðir hennar hafi látið lögfræðing þinglýsa pappír þar sem fram komi óskir hennar um að Rebekka fái forræði yfir strákunum og þeir muni alast upp saman. Rebekka mun svo senda pappírinn til barnaverndanefndar og sækja um forræði yfir börnunum.

„Ég trúi bara ekki að þeir eða þau fari að taka stráka sem hafa misst móður sína frá systir sinni sem hefur verið þeim eins og móðir, og koma þeim fyrir einhverstaðar í fóstur. Þeir eru mjög ánægðir í skólunum sínum og Örn elskar þetta hverfi, á fullt af vinum og við búum í góðri íbúð sem ég og þeir erum ekki að fara að flytja úr," segir Rebekka María á bloggsíðu sinni þar sem hún segir hispurslaust frá aðstæðum sínum og þeirri reynslu sem hún hefur upplifað.

Rebekka segir að mamma sín hafi leigt íbúðina af félagsþjónustunni og hún ætli að sækja um að fá að leigja hana áfram. „Það er bara ekki hægt að raska fleiru í lífi drengja minna," segir Rebekka.

Rebekka, sem á sjálf von á eigin barni, safnar nú peningum til þess að geta alið önn fyrir fjölskyldunni.

Reikningsnúmer söfnunarinnar er 140-05-070155

og kennitalan 160287-2259