Solskjær að taka við Molde

Norskir fjölmiðlar staðhæfa að Ole Gunnar Solskjær verði á morgun kynntur sem nýr þjálfari norska úrvalsdeildarfélagsins Molde.

Búist er við því að Solskjær verði kynntur á blaðamannafundi á morgun en fulltrúar hans eiga nú í samningaviðræðum við forráðamenn Molde og á aðeins eftir að ganga frá nokkrum smáatriðum.

Solskjær hefur verið á mála hjá Manchester United undanfarin fjórtán ár, bæði sem leikmaður og þjálfari. Hann er nú þjálfari varaliðs félagsins.

Solskjær hefur tvívegis áður hafnað boði Molde um þjálfarastarf en hann var keyptur til United frá Molde árið 1996.

Hann skoraði mörg mörk fyrir United í gegnum tíðina en það frægasta var í úrslitaleik Meistaradeildar Evrópu árið 1999, gegn Bayrn München, sem United vann á dramatískan máta.

Enskir fjölmiðlar greindu frá því í gær að það væri ósk Ferguson að Gary Neville myndi taka við starfi Solskjær og gegna því jafnvel samhliða því að spila með aðalliðinu.

Solskjær mun taka við starfinu í Molde í janúar ef fréttir norsku miðlana reynast réttar.

Enginn Íslendingur er á mála hjá Molde eins og er en frægt er þegar að Marel Baldvinsson, þáverandi leikmaður liðsins, kallaði Molde draugabæ árið 2007 í samtali við Fréttablaðið.