Yfirgáfu blindan félaga á Everest

Peter Kinloch var vanur fjallgöngum. Hann náði á tindinn án vandræða, en fljótlega á leiðinni niður fór hann að verða reikull í spori.

Hann sagði félögum sínum að hann væri farinn að sjá illa. Skömmu síðar varð hann alveg blindur. Þá voru þeir aðeins komnir 250 metra niður.

Félagarnir segja að þetta hafi ekki virst koma honum á óvart. Hann sagðist áður fengið blinduköst en þó aldrei í fjallgöngu.

Átta klukkustunda barátta

Sherpa leiðsögumenn sem höfðu farið á undan niður í búðirnar komu upp aftur til að aðstoða.

Þeir reyndu að hressa Peter við með því meðal annars að gefa honum yfirskammt af súrefni en ekkert gekk.

Eftir átta klukkustunda baráttu tókst að koma honum niður á stað sem kallaður er Mushroom Rock, sem er í 8.600 metra hæð.

Þá voru þeir sjálfir kalnir, ofkældir og örmagna. Þeir komust að þeirri niðurstöðu að það myndi aðeins kosta þá sjálfa lífið að halda áfram. Þeir kvöddu því Peter og héldu sjálfir niður í búðirnar.