Carragher bjartsýnn á að Liverpool nái fjórða sætinu

Jamie Carragher segir að leikmenn Liverpool séu ekki af baki dottnir þrátt fyrir tapið gegn Man. Utd um helgina og séu enn bjartsýnir á að geta náð hinu mikilvæga fjórða sæti í deildinni.

Liverpool er fjórum stigum á eftir Spurs sem er í fjórða sæti og hefur spilað fleiri leiki en Tottenham. Liverpool hefur einnig spilað fleiri leiki en Man. City og Aston Villa.

„Við verðum að jafna okkur á þessu tapi um helgina sem allra fyrst og komast aftur á sigurbraut. Að sjálfsögðu trúum við því að við getum náð fjórða sætinu. Við verðum samt helst að ná öllum þeim stigum sem eru í boði," sagði Carragher.

„Það verður harðari gagnrýni á okkur núna og hjá félagi eins og Liverpool er alltaf pressa. Þetta verður vissulega erfitt en það á enn eftir að spila um mörg stig."