Wright-Phillips: Ég er ekki gráðugur

Shaun Wright-Phillips viðurkennir að vera mjög svekktur með hversu illa gengur að semja við Man. City en segir að sama skapi ekkert vera hæft í þeim fréttum að hann sé svo gráðugur að ekki sé hægt að semja.

Fósturfaðir hans, Ian Wright, skammaði forráðamenn City í gær fyrir draga málið og sakaði þá um að koma fram við Phillips eins og leikmann unglingaliðsins.

„Ég reyni að halda sjálfum mér frá samningaviðræðunum og einbeiti mér frekar að því að spila vel fyrir City því við þurfum að ná fjórða sætinu í deildinni," sagði Phillips.

„Þetta særir mig samt og staðan veldur mér vonbrigðum. Ég vil líka endurtaka að vandamálið hefur ekkert að gera með peninga eða einhverja meinta græðgi í mér.

Eitt er það sem ég vil alls ekki blanda mér í og það er umræðan um það hvað menn fá í laun hjá þessu félagi. Ég veit að það eru samt menn hér sem eru með tvöfalt hærri laun en ég. Það skiptir mig samt ekki máli. Þetta snýst ekki um bankareikninginn heldur hvar ég vil spila fótbolta."