Suður-Kórea hótar hörðum refsingum

Stöðvun allra viðskipta við Suður-Kóreu verður væntanlega þungur skellur fyrir íbúa Norður-Kóreu, því næst á eftir Kína eiga Norður-Kóreumenn mest viðskipti við nágranna sína í Suður-Kóreu.

Lim Eul-Chul, sérfræðingur í málefnum Norður-Kóreu, segir að viðskiptabannið muni kosta Norður-Kóreumenn 200 milljónir dala á ári.

„Við höfum alltaf sýnt grimmd Norður-Kóreu umburðarlyndi, hvað eftir annað," sagði Lee Myung-bak, forseti Suður-Kóreu, í ávarpi til þjóðarinnar. „Nú er öðru máli að gegna. Norður-Kórea mun greiða gjald í samræmi við ögrandi verk sín."

Hann sagði árásina á herskipið hafa breytt öllu á Kóreuskaga, en formlega eiga Kóreuríkin enn í stríði því eftir Kóreustríðið fyrir rúmri hálfri öld var aldrei samið um frið heldur aðeins um vopnahlé.

Ban Ki-moon, framkvæmdastjóri Sameinuðu þjóðanna sem sjálfur er Suður-Kóreumaður, sagðist reikna með að málið kæmi til kasta öryggisráðs Sameinuðu þjóðanna.

Hillary Clinton, utanríkisráðherra Bandaríkjanna, var í Suður-Kóreu í gær og sagði ástandið orðið ótryggt.

Fjörutíu og sex menn fórust með suður-kóreska herskipinu Cheonan, sem sökkt var í Gulahafi 26. mars. Ljóst þykir að tundurskeyti hafi verið skotið á skipið og böndin berast að Norður-Kóreu.

gudsteinn@frettabladid.is