Aquilani orðaður við Fiorentina

Ítalski miðjumaðurinn hjá Liverpool, Alberto Aquilani, er orðaður við Fiorentina í ítölskum fjölmiðlum í dag.

Það er aðeins ár síðan Aquilani fór til Liverpool frá Roma en hann hefur ekki komist í gang hjá Liverpool og hefur því þráfaldlega verið orðaður við félög í heimalandinu.

Umboðsmaður Aquilani hefur á móti sagt að það sé engin ástæða fyrir leikmanninn að yfirgefa Liverpool.

Þess utan er ekki líklegt að Liverpool sé til í að láta hann fara fyrir lítinn pening eftir að hafa greitt háa summu fyrir hann síðasta sumar. Hann er einnig með hærri laun hjá Liverpool en Fiorentina myndi ráða við.