Drogba: Ég er allt öðruvísi leikmaður en Rooney

Didier Drogba, framherji Chelsea, verður ekkert pirraður á því að vera borinn saman við Wayne Rooney hjá Manchester United. Drogba og Rooney eru ekki bara að keppa um meistaratitilinn með liðum sínum því þeir eiga einnig í harði baráttu um gullskóinn.

„Það pirrar mig ekkert ef fólk vill bera okkur saman og ég sjálfur trúi því ekki að það sé til einn leikmaður sem er bestur. Þú ert kannski bestur á einum tímapunkti en á þeim næsta er það einhver annar sem stendur fremstur," sagði Didier Drogba.

Wayne Rooney hefur skorað 21 mark í ensku úrvalsdeildinni og er markahæstur. Didier Drogba hefur skorað 17 mörk fyrir Chelsea. Didier Drogba hefur hinsvegar átt 9 stoðsendingar á félaga sína á sama tíma og Rooney hefur lagt upp 4 mörk fyrir aðra leikmenn United.

„Rooney er ótrúlegur leikmaður en við erum mjög ólíkir leikmenn. Ég er allt öðruvísi leikmaður en Rooney," segir Drogba.

Rooney hefur skorað 15 mörk með hægri, 3 með vinstri og 3 með skalla. Hann hefur skorað 6 mörk úr markteig og ekkert marka hans hefur komið fyrir utan teig. Rooney skorar mest í upphafi og lok seinni hálfleiks.

Drogba hefur skorað 11 mörk með hægri, 4 með vinstri og 2 með skalla. Hann hefur skorað 2 mörk úr markteig og 4 fyrir utan teig. Drogba skorar mest í lok fyrri hálfleiks.