Mikið um dekkjaþjófnað á höfuðborgarsvæðinu

Mikið hefur verið um dekkjaþjófnað á höfuðborgarsvæðinu á undanförnum mánuðum og dæmi um að dekkjum hafi verið stolið undan bíl fyrir framan heimili fólks á meðan það var í fastasvefni.

Dekkjaþjófar hafa verið nokkuð stórtækir á höfuðborgarsvæðinu að undaförnu samkvæmt upplýsingum frá lögreglunni.

Um síðustu helgi voru tveir dekkjaþjófar staðnir að verki í Grafarvogi og aðrir náðu að stela dekkjum undan fjölskyldubíl í Mosfellsbæ. Mál af þessu tagi koma nánast vikulega inn á borð lögreglu.

Fréttastofa þekki dæmi þar sem dekkjum var stolið undan bíl í miðju íbúðahverfi á meðan eigendurnir sváfu. Eigendurnir voru að vonum hissa daginn eftir þegar þeir komu að bílnum dekkjalausum.

Þetta eru ekki flóknar aðferðir sem dekkjaþjófarnir nota. Þeir koma bara með venjulegan tjakk og lyfta bílnum upp, setja tré- eða plastkubba undir, hirða dekkin og svo þegar eigendurnir koma út þá finna þeir bílinn dekkjalausan á planinu.

Þjófnaðir af þessu tagi eru algengastir í hverfum þar sem umferð er lítil á kvöldin. Til dæmis í iðnaðarhverfum þar sem bílum er lagt fyrir utan bílaverkstæði.

Álfelgur eru sérstaklega vinsælar en þjófarnir koma dekkjunum í verð með því að auglýsa þau til sölu á netinu. Lögreglan vill vara fólk við því að kaupa dekk í gegnum netið - sérstaklega þegar verðið er grunsamlega lágt. Í þeim tilvikum gæti verið um þýfi að ræða.