Vangaveltur um framtíð Gary Neville hjá United

Sir Alex Ferguson, stjóri Manchester United, hefur gefið í skyn að gamli varnarjaxlinn, Gary Neville, verði áfram á Old Trafford næsta árið.

Hinn 35 ára gamli Gary Neville verður samningslaus í sumar og vangaveltur eru um framtíð leikmannsins hjá félaginu.

Það hefur komið til tals að Neville sameinist aftur yngri bróður sínum, Phil Neville, en hann spilar með Everton. Ferguson segir að Gary hafi enn margt fram að færa í herbúðum United.

„Það hefur ekki verið tekin nein ákvörðun um framtíð Neville og það er vegna þess að við höfum ekki rætt þessi mál. Það mun koma að því en ekkert hefur gerst enn þá," sagði Ferguson.