Walcott: Við erum ennþá með í titilbaráttunni

Vængmaðurinn Theo Walcott hjá Arsenal er sannfærður um að Lundúnafélagið geti enn orðið enskur meistari á þessu keppnistímabili þrátt fyrir að liðið hafi svo gott sem verið afskrifað úr kapphlaupinu eftir töp gegn Manchester United og Chelsea.

Nú þegar ellefu leikir eru eftir hjá toppliðunum er Arsenal aðeins sex stigum á eftir Chelsea og tveimur stigum á eftir United og Walcott telur að Arsenal eigi því góða möguleika á að hirða titilinn.

„Ég held að fólk hafi afskrifað okkur of snemma. Við erum aðeins sex stigum frá toppsætinu og þetta lítur því alls ekki illa út og við erum ennþá með í titilbaráttunni. Við skulum sjá til hvernig lokaspretturinn verður," sagði Walcott í viðtali við Sky Sports fréttastofuna.