Bræður seldu fíkniefni á Akureyri

Maður um tvítugt hefur játað fíkniefnasölu á Akureyri. Hann segir bróður sinn hafa aðstoðað sig við söluna en bróðirinn vill lítið tjá sig.

Bræðurnir voru handteknir síðasta miðvikudag, ásamt tveimur öðrum mönnum, í bifreið við Giljaskóla á Akureyri.

Grunsemdir höfðu vaknað um að tveir mannanna, bræður um tvítugt, stæðu í fíkniefnasölu og styrktist sá grunur þegar lögreglan fann nokkra poka með maríjuana á mönnunum.

Að fengnum dómsúrskurði gerði lögreglan húsleit á dvalarstað bræðranna og fann þar um 70 grömm af mariíuana til viðbótar. Hluta efnisins hafði verið pakkað í sölueiningar.

Við húsleitina lagði lögregla einnig hald á peninga sem taldir eru hagnaður af fíkniefnasölu. Auk þessa var ökumaður bifreiðarinnar grunaður um akstur undir áhrifum fíkniefna.

Málið telst upplýst en lögreglan minnir sem fyrr á fíkniefnasímsvarann 800-5005 þar sem koma má á framfæri upplýsingum um fíkniefnamisferli.