Lyfti ekki litlafingri gegn Ögmundi

Þótt síðustu misseri hafi verið erfið og einstök deilumál hafi komið upp er það mikill misskilningur að VG eigi í sérstökum innanflokksvandræðum þessa dagana, segir Steingrímur J. Sigfússon, formaður VG. Opinská skoðanaskipti séu hluti af hefð flokksins og menningu.

Í fréttaskýringu blaðsins í gær var greint frá kergju meðal flokksmanna og sér í lagi milli stuðningsfólks Ögmundar Jónassonar annars vegar og Steingrímsmanna hins vegar. Meðal annars var rætt um að fólk Steingrímsmegin hefði barist gegn fólki Ögmundarmegin í nýloknu forvali.

Spurður hvort hann kannist við þetta og hafi sjálfur komið að máli, segir Steingrímur: „Ég lyfti ekki litlafingri og kom ekki nálægt þessum prófkjörum og hef aldrei gert eftir að ég varð formaður. Ég held það séu einhver undantekningartilvik sem menn eru að vitna í. Hvað einhverjir segja í símtölum sín á milli, það er ómögulegt að elta ólar við það, en auðvitað er það þannig að það hriktir oft í flokkum þegar farið er í forvöl."

Fjarstæðukennt sé að í VG séu skýrar línur flokksmanna sem megi skipta í arma, heldur skerist línur á ýmsan hátt, eftir málefnum eða frambjóðendum hverju sinni. Auðvitað sé óþol í fólki gagnvart ríkisstjórninni og þess vænst að hún komi fleiri málum í gang. „En ég tel að það sé mikill og eindreginn stuðningur í flokknum um að við höldum áfram í ríkisstjórn," segir Steingrímur.

Ögmundur Jónasson segir, spurður um ástand flokksins, að það væri óheiðarlegt fyrir mann sem fór úr ríkisstjórn vegna ágreinings að láta sem ekkert hafi á bjátað í flokknum: „En ég er sannfærður um að ef menn einblína á hugsjónir okkar og sameiginleg markmið takist okkur að yfirstíga tímabundna erfiðleika."- kóþ