Arsenal vann Stoke - Ramsey fótbrotnaði

Arsenal vann góðan 1-3 sigur gegn Stoke á Britannia-leikvanginum í ensku úrvalsdeildinni í dag en gestirnir urðu þó fyrir áfalli þegar Aaron Ramsey fótbrotnaði eftir tæklingu frá Ryan Shawcross.

Heimamenn í Stoke tóku forystu í leiknum með marki Danny Pugh snemma leiks en Nicklas Bendtner jafnaði leikinn eftir um hálftíma leik og staðan var 1-1 í hálfleik.

Ljótt atvik átti sér svo stað á 69. mínútu þegar hinn efnilegi Aaron Ramsey þurfti að yfirgefa leikvanginn eftir tækilingu frá Ryan Shawcross og greinilegt að um fótbrot var að ræða.

Shawcross fékk að líta rautt spjald en Ramsey var fluttur strax með sjúkrabíl og augljóst að leikmönnum beggja liða var mjög brugðið við atvikið.

Arsenal lét hins vegar ekki slá sig út af laginu og skoraði tvö mörk á lokakafla leiksins, fyrst var það Cesc Fabregas sem skoraði af vítapunktinum og svo Thomas Vermaelen með skoti af stuttu færi.

Arsenal er sem fyrr í þriðja sæti deildarinnar en nú aðeins fimm stigum á eftir toppliði Chelsea eftir leiki dagsins.