Fernando Torres verður að fara til hnésérfræðings

Fernando Torres, framherji Liverpool, verður sendur til hnésérfræðings til að kanna meiðsli þau sem héldu honum frá markalausa jafnteflinu á móti Fulham um helgina. Torres hefur verið mikið frá vegna meiðsla á þessu tímabili og það hefur háð Liverpool-liðinu mikið.

Fjarvera hins 26 ára spænska landsliðsmanns var mikið áfall fyrir Liverpool og úrslit helgarinnar þýddu að Liverpool á ekki lengur raunhæfa möguleika á að komast í Meistaradeildina á næsta ári.

„Torres þarf að fara til sérfræðings og við erum að bíða eftir fréttum," sagði Rafael Benitez, stjóri Liverpool. Torres hefur verið að glíma við þessi hnémeiðsli í vetur og fór í aðgerð í janúar. Hann var einnig frá vegna nárameiðsla fyrir jól.

„Við vitum ekkert hversu alvarlegt þetta er og verðum því að bíða eftir niðurstöðunum frá sérfræðingunum. Hann hefur verið að glíma við þessi meiðsli áður og við vorum að reyna að hlífa honum," sagði Benitez.

Fernando Torres hefur skorað 22 mörk í 32 leikjum í öllum keppnum fyrir Liverpool á tímabilinu og það er flestum ljóst að bitleysi sóknarleiks Liverpool í vetur má rekja til fjarveru hans. Það sást sem dæmi í leiknum á móti Fulham um helgina.