Verðtryggingin dýrari til lengri tíma

Myntkörfulán kunna til lengri tíma séð að vera hagstæðari en þau verðtryggðu, þrátt fyrir gengishrunið sem hófst fyrri hluta árs 2008. Fólk ætti því að hugsa sig vel um áður en það skuldbreytir slíkum lánum. Einnig gæti það verið fólki bjarnargreiði ef dómstólar breyta þeim yfir í verðtryggð lán, í ljósi hugsanlegs ólögmætis gengistryggingar.

Þetta er mat Þorsteins Sigurlaugssonar hagfræðings.

„Þetta er auðvitað háð ýmsu. Það eru litlar líkur á að það sé óhagstætt að breyta skammtímalánum, svo sem bílalánum, yfir í innlend lán, en um leið og reiknað er með verðbólguáhrifum til lengri tíma eru þau fljót að hækka höfuðstólinn," segir hann.

Þorsteinn hefur sett upp dæmi þar sem hann ber saman tvö tíu milljóna króna lán til þrjátíu ára, tekin 2004. Miðað er við þriggja prósenta verðbólgu, sömu vexti og óbreytta gengisvísitölu hér eftir.

Sem stendur er myntkörfulánið um fjórðungi hærra. En verðtryggða lánið verður orðið jafn dýrt árið 2017. Í lok lánstímans er hið íslenska svo orðið tæpum fjörutíu prósentum dýrara.

- kóþ