Um helmingur stöðuveitinga á pólitískum forsendum

Um helmingur stöðuveitinga í stjórnsýslunni eru á pólitískum forsendum, sagði Gylfi Dalmann Aðalsteinsson, dósent í viðskiptafræði við Háskóla Íslands í þættinum Sprengisandi á Bylgjunni í morgun.

Máli sínu til stuðnings vísaði Gylfi í rannsóknir Gunnars Helga Kristinssonar prófessors í stjórnmálafræði. Gylfi sagði að þetta vekti upp spurningar um það hvort nauðsynlegt væri að horfa á starfsmannamál í stjórnsýslunni með nýjum hætti. Hvort rétt væri að skipta út mönnum í stjórnsýslunni við valdaskipti.

Gylfi sagðist hafa saknað umfjöllunar um þetta úr skýrslu rannsóknarnefndar Alþingis og úr umfjöllun þingmannanefndar Atla Gíslasonar.