Líta aðgerðir flugumferðarstjóra alvarlegum augum

Samgönguráðherra vonar að samningur takist í deilu flugumferðarstjóra í dag, en minnir á að stutt sé í boðaðar aðgerðir flugumferðarstjóra. Það líti stjórnvöld alvarlegum augum.

Flugumferðarstjórar og viðsemjendur þeirra mættu til fundar hjá Ríkissáttasemjara klukkan hálf tíu í morgun þar sem úrslitatilraun er gerð til að ná samningi áður en fjögurra stunda vinnustöðvun flugumferðarstjóra hefst klukkan sjö í fyrramálið. Síðastliðinn fimmtudag munaði minnstu að Alþingi kæmi saman þar sem Kristján L. Möller, samgönguráðherra, var tilbúinn með frumvarp sem stöðvaði aðgerðir á föstudagsmorgun, með því að framlengja kjarasamningi flugumferðarstjóra til nóvembermánaðar.

Kristján segir að ekki sé búið að taka ákvörðun um það hvort að frumvarpið verði lagt fram í dag komist deiluaðilar ekki að samkomulagi. Hann bendir á að samningafundur stendur nú yfir. „Við skulum bara vona að menn tali saman og ljúki samningum," segir ráðherrann. Hann vonar að samningur takist í deilunni í dag. Stjórnvöld líti boðað verkfall afar alvarlegum augum þar sem það myndi hafa slæmar afleiðingar í för með sér.