Salif Diao tryggði Stoke sigur á Portsmouth í lokin

Stoke fór langt með það að fella Portsmouth úr ensku úrvalsdeildinni eftir 2-1 sigur á Fratton Park í kvöld. Salif Diao tryggði Stoke sigurinn með marki í uppbótartíma eftir að Portsmouth hefði verið betri aðilinn stærstan hluta leiksins.

Sigurmarkið hjá Salif Diao kom á fyrstu mínútu uppbótartímans eftir skyndisókn og sendingu frá Ricardo Fuller. Frédéric Piquionne kom Portsmouth í 1-0 á 35. mínútu en Þjóðverjinn Robert Huth jafnaði leikinn með skalla eftir hornspyrnu á 50. mínútu.

Hermann Hreiðarsson lék allan leikinn í miðri vörn Portsmouth. Stoke hefur ekki tapað í síðustu sjö leikjum og liðið er nú komið upp að hlið Fulham í 10. og 11. sæti deildarinnar. Portsmouth er áfram í neðsta sæti, átta stigum frá öruggu sæti.