Wenger: Við erum í sterkri stöðu

Arsene Wenger, stjóri Arsenal, segir að lið sitt sé í sterkri stöðu í baráttunni um enska meistaratitilinn og krefst þess að leikmenn sínir haldi einbeitingu.

Arsenal er aðeins tveim stigum á eftir toppliði Man. Utd og á auðveldari leiki eftir á pappírunum en United og Chelsea sem eiga þess utan eftir að mætast innbyrðis.

„Við verðum eðlilega að hugsa bara um einn leik í einu en við höfum löngunina og gæðin til þess að fara alla leið. Ég trúi því að við getum unnið næstu leiki. Viðhorf leikmanna er þannig að reyna að vinna alla leiki en ekki sætta sig við jafntefli," sagði Wenger.

„Við erum svo gott sem búnir að tryggja okkur í Meistaradeildina og næsta skref er að stefna á titilinn sjálfan. Til að það takist verðum við að vinna alla okkar leiki. Við erum í sterkri stöðu en við verðum að halda áfram að bæta okkur."