Engar reglur brotnar varðandi Inspired by Iceland

Iðnaðarráðherra segir reglur varðandi útboð ekki hafa verið brotnar í tengslum við landkynningarátakið Inspired by Iceland, en það kostar upp undir milljarð króna.

Sólveig Dagmar Þórisdóttir sem rekur Auglýsingastofu Íslands og hefur víðtæka reynslu af ferðaþjónustu gagnrýnir á bloggi sínu það sem hún kallar spillingu í tengslum við kynningaráttakið Inspired by Iceland. Hún segir að Einar Karl Haraldsson hafi verið settur yfir verkið af hálfu stjórnvalda og öll lög um útboð brotin og aðeins tveimur útvöldum auglýsingastofum hleypt að verkefninu. Ríkið leggur 350 milljónir fram til verkefninsins gegn sama framlagi fyrirtækja í ferðaþjónustu. Ferðaþjónustufyrirtækin kaup efni af auglýsingastofum og öðrum aðilum og verkefnin séu því fjölmörg þótt þau stefni að sama marki.

Katrín Júlíusdóttir, iðnaðarráðherra segir að ríkisvaldið hafi notað fjármagnið sem það leggur til í þetta verkefni meðal annars til að fjármagna blaðamannafundi erlendis og að halda tónleika.

Hún segir að ef um eitt heildarverkefni hefði verið að ræða hefði þurft að bjóða það út á öllu Evrópska efnahagssvæðinu og það tafist um að minnsta kosti 4 vikur. Hún segir að stjórn verkefnisins sem sé skipuð fulltrúum úr ferðaþjónustunni og víðar hafi að lokinni könnun gert samning við fimm auglýsingastofur.

En þvertekur hún fyrir það að málið lykti af spillingu? „Auðvitað þvertek ég fyrir það," segir Katrín sem segir að átakið hafi verið unnið á tíma ljóssins til að bjarga því sem bjargað verður eftir að ferðaþjónustan missti mikið af ferðamönnum eftir hrunið.