Hnéð á Rooney áhyggjuefni

Svo gæti farið að Sir Alex Ferguson hvíli Wayne Rooney í leiknum gegn Bolton á laugardag. Hnéð á Rooney er ekki gott og hann þarfnast hvíldar.

Rooney haltraði eftir leikinn gegn Liverpool um síðustu helgi. Meiðslin sem hann varð fyrir áttu að hverfa á einum mánuði en það hefur ekki gengið eftir.

Hnéð er enn að angra hann og bólgnar eftir leiki.

Rooney varð fyrir meiðslunum í úrslitum deildarbikarsins á Wembley. Hann spilaði svo 86 mínútur á Wembley með enska landsliðinu nokkrum dögum síðar og það ku hafa farið afar illa með hnéð á leikmanninum.

Meiðslin eru einnig mikið áhyggjuefni fyrir enska landsliðið enda fer það tæplega langt á HM án Rooney í toppformi.