„Mottu-merki“ seld á kjörstað

„Mottu-mars," mánaðarlangt átak Krabbameinsfélags Íslands um karlmenn og krabbamein hefur farið vel af stað en fjölmargir karlmenn hafa sýnt átakinu stuðning með því að safna yfirvaraskeggi og skrá sig á vefsíðu átaksins.

Á morgun verður þungamiðja í átakinu þegar skeggnælur, barmmerki í líki yfirvararskeggs, verða seldar við kjörstaði um land allt og verður öllum ágóða af söfnunarstarfi átaksins varið til rannsókna, fræðslu, ráðgjafar og stuðnings við krabbameinssjúklinga og aðstandendur þeirra.

„Það var nú tilviljun ein sem réði því að sala nælunnar fer fram á kjördag en fyrst það atvikaðist svo ákváðum við að nýta okkur það til að ná til almennings með ósk um stuðning," segir Guðrún Agnarsdóttir, forstjóri Krabbameinsfélags Íslands.

Minni lífslíkur hjá körlum

Yfir 700 karlar greinast árlega með krabbamein á Íslandi en lífslíkur þeirra eru lakari en hjá íslenskum konum. „Krabbamein hjá körlum eru oft lengra gengin við greiningu en hjá konum en því fyrr sem gripið er til aðgerða gegn sjúkdómnum þeim mun betri eru batahorfur. Því er nauðsynlegt að karlar geri sér grein fyrir helstu einkennum krabbameins og leiti sér læknisaðstoðar verði þeir varir við þau," segir Guðrún.

„Batahorfur þeirra sem greinast með krabbamein hér á landi eru almennt góðar og hafa batnað mjög en brýnt er að greina meinin snemma. Því þurfa allir að þekkja einkennin og leita sér aðstoðar ef þörf er á."

Forstjóri Krabbameinsfélagsins minnti einnig á mikilvægi forvarna í baráttunni við krabbamein en rannsóknir sýna að hægt er að koma í veg fyrir eitt af hverjum þremur krabbameinstilfellum með forvörnum og lífstíl eins og að borða hollan mat, stunda líkamsrækt reglulega, stilla drykkju og sólböðum í hóf og halda sig alveg frá reykingum!