Ögmundur: Gleðin er innan viðráðanlegra marka

Ögmundur Jónasson, þingmaður Vinstri grænna, segist aldrei hafa verið andvígari inngöngu Íslands að Evrópusambandinu en núna. Einar K. Guðfinnsson, þingmaður Sjálfstæðisflokks, spurði Ögmund á Alþingi í dag hvort hann deili gleði forsætisráðherra vegna frétta af ákvörðun framkvæmdastjórnar ESB að mæla með aðildarviðræðum við Ísland. Ögmundur sagði að gleði sín væri innan viðráðanlegra marka.

Framkvæmdastjórn Evrópusambandsins mun á fundi sínum þann 24. febrúar næstkomandi mæla með því að hafnar verði aðildarviðræður við Íslendinga. Þetta hafði Reuters fréttastofan eftir ónafngreindum heimildarmönnum í gær. Jóhanna Sigurðardóttir, forsætisráðherra, fagnaði ákvörðuninni og talaði um gleðilegan áfanga og gott skref.

Einar rifjaði upp að Ögmundur var meðal þeirra þingmanna sem samþykktu síðasta sumar að sækja um aðild að Evrópusambandinu. Ögmundur sagðist vilja fá úr því skorið hvort almenningur vilji að Ísland verði hluti af sambandinu í kosningum.

Þá sagði Ögmundur að skrifræðisbáknið í Brussel væri „óseðjandi ófreskja" og gríðarlega dýrt. Því verði stjórnvöld að gæta sín að umsóknarferlið verði ekki of kostnaðarsamt.