Talið að erlend glæpasamtök hafi sent konurnar

Karl Steinar Valsson, yfirmaður fíkniefnadeildar hjá lögreglunni, segir að það sé eðlileg ályktun að telja að erlend glæpasamtök hafi sent tvær konur til landsins með 20 lítra af amfetamínbasa þann 17. júní síðastliðinn.

Konurnar, sem eru þýskir ríkisborgarar en fæddar í Rússlandi og Kasakstan, voru teknar þegar þær komu með Norrænu á Seyðisfirði á þjóðhátíðardaginn. Í bensíntanki bílsins voru 20 lítrar af amfetamínbasa en með vökvanum er hægt að framleiða allt upp í 264 kíló af amfetamíni. Þær sitja nú í gæsluvarðahaldi til 2. júlí að minnsta kosti.

Karl Steinar segir að formið á flutningnum, að efni í fljótandi formi sé komið fyrir í bensíntanki, sé þekkt aðferð sem brotahópar í Austur-Evrópu eru þekktir fyrir að nota. Rannsókn lögreglunnar lítur að því að komast að því hverjir standi að baki flutningnum. Karl Steinar segir að það sé eðlilegt að draga þá ályktun að erlend glæpasamtök standi að baki smyglinu „...því annars væri aldrei hægt að geta gert þetta með þeim hætti sem þetta er."

Lögreglan vinnur í samstarfi við Europol sem sér um tengsl hennar við lögregluyfirvöld í öðrum löndum. „Öll svona mál vinnum við í gegnum Europol sem sér síðan um okkar tengingar við þau lönd sem við teljum að tengjast málunum á hverjum tíma fyrir sig." Fókus lögreglunnar er á þau hefðbundnu lönd þar sem amfetamínframleiðsla hefur verið mikil.

Hann segir rannsóknina ganga ágætlega en ekki sé hægt að segja til um tengsl Íslands við málið. „Það er í ákveðnu ferli, það er ekkert hægt að segja til um það enn þá."