Beittu kylfu og járnkeðju

Fjórir karlmenn eru nú fyrir Héraðsdómi Reykjavíkur, ákærðir fyrir hrottalega líkamsárás.

Mennirnir sem allir eru á þrítugsaldri eru ákærðir fyrir húsbrot, líkamsárás og hótanir. Þeim er gefið að sök að hafa, sunnudaginn 4. október á síðasta ári ruðst, í félagi við óþekktan karlmann, inn í íbúðarhúsnæði í kjallara hússins að Spítalastíg 6 í Reykjavík. Innrásin var gerð að undirlagi eins fjórmenninganna.

Þar veittust þeir að karlmanni, slógu hann í líkama og höfuð með golfkylfu og járnkeðju. Jafnframt ógnuðu þeir honum með hnífi, sem borinn var upp að andliti hans. Þá ógnuðu þeir konu í íbúðinni með hnífi, sem þeir báru að maga hennar. Þeir kýldu hana einnig í höfuðið og líkamann.

Afleiðingar árásarinnar urðu þær að karlmaðurinn sem fjórmenningarnir gengu í skrokk á hlaut mikið mar á höfði og tvo skurði á hnakka.

Hann var einnig mikið marinn og bólginn víða um líkamann. Þá hlaut hann skurð á tungu, mar í andliti og heilahristing.

Sá sem ráðist var á gerir kröfu um skaða- og miskabætur frá fjórmenningunum að upphæð ríflega 1,5 milljónir króna. - jss