Google hannar sjálfakandi bíl

Verkfræðingar Google fyrirtækisins hafa hannað sjálfkeyrandi bíl, og ekið honum þúsundir kílómetra án óhappa.

Það er verkfræðingurinn Sebastian Thrun sem hefur yfirumsjón með verkinu en í viðtali við The New York Times segir hann markmið verkefnisins að hanna öruggt faratæki sem gæti mögulega dregið úr þeim fjölda banaslysa sem verða í umferðinni á ári hverju í Bandaríkjunum.

Vísindamennirnir hafa þegar sent bílinn yfir Gullnu brúna í San Francisco og alla leiðina til Tahoe vatns (Lake Tahoe) án þess að lenda í óhappi.

Ökumaður situr allan tímann við stýrið komi eitthvað upp á. Hann hefur ekki þurft að grípa í taumana enn. Bíllinn er útbúin myndavélum og fjölmörgum skynjurum auk flókins tölvubúnaðar.

Eitt umferðaróhapp hefur orðið við tilraunir á bílnum, þá ók annar bíll aftan á Google-bílinn.

Verkfræðingurinn segir verkefnið enn á miklu tilraunastigi. Hann segir það þó gefa innsýn inn í framtíðina, „og hún virðist vera spennandi staður," sagði Thurn að lokum.