United enn ríkasta félag heims

Manchester United er enn ríkasta félag heims, samkvæmt lista sem Forbes-tímaritið gaf út í kvöld.

United var í öðru sæti á samskonar lista sem Deloitte gaf út í febrúar, þá á eftir Real Madrid.

Forbes metur að virði United sé 1,84 milljarða dollara. Real kemur næst og er metið 1,32 milljarða og Arsenal í þrijða sæti með 1,18 milljarða.

Forbes styðst við gögn um sjónvarps- og auglýsingatekjur, miðasölu og sölu á varningi til að reikna út virði félaganna.

Barcelona er í fjórða sæti listans sem telur alls tuttugu félög. Alls eru sex ensk úrvalsdeildarfélög á listanum auk Newcastle sem nýverið tryggði sér sæti í deildinni á ný eftir að hafa spilað í ensku B-deildinni í vetur.

Liverpool, Chelsea og AC Milan eru öll á meðal tíu efstu á listanum en samkvæmt útreikningum Forbes féll virði félaganna um nítján prósent hvert frá síðasta ári.