Tevez ætti að ná leiknum gegn Chelsea um helgina

Kia Joorabchian, talsmaður Carlos Tevez hjá Manchester City, hefur staðfest að skjólstæðingur sinn ætti að ná leiknum gegn Chelsea um næstu helgi.

Tevez hefur verið í leyfi í Argentínu vegna fjölskyldumála þar sem eiginkona hans eignaðist dóttur langt fyrir tímann og hefur í kjölfarið misst af tveimur deildarleikjum og einum bikarleik hjá City.

Tevez missir ennfremur af bikarleiknum gegn Stoke á miðvikudag en ætti svo að verða klár í slaginn að nýju.

„Hann hefur aldrei beðið um frí áður en þegar nýfætt barn manns er í gjörgæsludeild þá hljóta menn að skilja að hann varð að fara og vera með fjölskyldu sinni.

Hann vonar hins vegar að geta komið aftur fyrir leikinn gegn Chelsea og að dóttir hans verður vonandi á góðum batavegi þá," segir talsmaðurinn í viðtali við Sky Sports fréttastofnuna.