Kattauppskrift kemur sjónvarpskokki í koll

Ítalska ríkissjónvarpið hefur rekið vinsælan sjónvarpskokk eftir að hann bauð upp á uppskrift að því hvernig elda eigi ketti, í sjónvarpsþætti sínum. Beppe Brigazzi segist sakna starfsins en þvertekur fyrir að biðjast afsökunar þar sem hann hafi aðeins verið að fræða áhorfendur um matarmenningu Ítala fyrr á öldum.

Hann bendir á að í mörgum héruðum landsins hafi lengi tíðkast að borða heimilisköttinn þegar hart var í ári. Í þættinum gaf Brigazzi góð ráð um hvernig best væri að hantera kjötið til þess að það verði sem meyrast. Til dæmis er gott að láta það liggja í rennandi vatni í þrjá daga áður en það er steikt.

Kokkurinn segist oft hafa étið ketti og að kjötið sé mun betra en kanínu og kjúklingakjöt.