Um 80% heimila heimsótt í gær

Gert er ráð fyrir að um það bil 80% af heimilum landsins hafi verið heimsótt af sjálfboðaliðum Rauða krossins í gær. Rauði krossinn þakkar sjálfboðaliðum sem gengu til góðs og þeim sem tóku á móti sjálfboðaliðunum og gáfu í söfnunina, í tilkynningu sem send var fjölmiðlum í morgun.

Rauði krossinn hvetur þá sem ekki voru heima þegar sjálfboðaliða bar að garði eða búa í hverfum sem ekki tókst að fullmanna, að hringja í söfnunarsíma Göngum til góðs ef þeir vilja styrkja málefnið. Hægt er að hringja í þrjú símanúmer: 904 1000, 904 3000, og 904 500, og þá bætast við 1.000 kr., 3.000 kr. eða 5.000 kr. við næsta símreikning. Símafyrirtækin taka ekkert fyrir símtalið.

Tobba Marinósdóttir fjölmiðlakona, sem tók þátt í auglýsingaherferð Rauða krossins, gekk Karlagötuna ásamt kærasta sínum Karli Sigurðssyni borgarfulltrúa. Hún segir íbúa þar hafa tekið ótrúlega vel á móti þeim og þetta hafi verið sérstök upplifun að fara út fyrir sitt venjulega umhverfi og safna fé með þessum hætti.

Rauði krossinn segir að uppgjör vegna söfnunarinnar muni ekki liggja fyrir fyrr en eftir helgi þar sem fjölmargar deildir á landsbyggðinni hafi ekki tök á að skila af sér fyrr en á morgun.